Lead Organisation: STAND Gogledd Cymru
Gofynnwyd i rieni a gweithwyr proffesiynol sy’n byw yn Sir Ddinbych ac sy’n cael eu cefnogi gan STAND Gogledd Cymru CIC, i fynd o amgylch eu hardal leol yn Sir Ddinbych ac archwilio cymaint o fannau chwarae ag y gallant eu nodi a chael mynediad atynt yn ystod y cyfnod archwilio. Pwrpas yr archwiliad oedd ymchwilio p’un a yw mannau chwarae yn Sir Ddinbych wedi cael eu dylunio mewn modd sy’n cefnogi chwarae cynhwysol i blant a phobl ifanc o bob oedran a gallu.
Roedd y cyfnod archwilio rhwng 24 Chwefror a 20 Mai. Yn ystod y cyfnod hwn casglwyd 36 o ymatebion. Cafwyd ymatebion gan gymysgedd o rieni a gweithwyr proffesiynol. Lluniwyd yr archwiliad mewn modd a oedd yn cynnwys pob man chwarae yn Sir Ddinbych, boed yn perthyn i’r cyngor, cymdeithas dai neu rai preifat. O’r 36 archwiliad a gynhaliwyd, roedd 22 ohonynt ar feysydd chwarae ac ardaloedd chwarae sy’n perthyn i Gyngor Sir Ddinbych, yn ôl y rhestr o fannau chwarae ar eu gwefan.
Roedd yr archwiliad yn cynnwys cwestiynau am hygyrchedd gan gynnwys agosrwydd gwasanaethau trafnidiaeth gyhoeddus, a gwahanol amodau a allai effeithio ar allu teuluoedd sy’n defnyddio cymhorthion symudedd i gael mynediad at y safleoedd. Gofynnwyd cwestiynau iddynt am ddiogelwch ac argaeledd gwybodaeth am y man chwarae. Gofynnwyd iddynt hefyd am agosrwydd cyfleusterau i’r mannau chwarae gan gynnwys meinciau, toiledau a lluniaeth.
Gofynnwyd cwestiynau hefyd am ymgysylltiad synhwyraidd ac ystod y cyfleoedd am wahanol arddulliau chwarae. Dylai mannau chwarae cynhwysol a hygyrch annog ymgysylltiad synhwyraidd yn y man chwarae a dylai gynnig cyfleoedd i unigolion ymgysylltu ag amrywiaeth o wahanol arddulliau chwarae.
O’r Mannau Chwarae yn Sir Ddinbych yr ymwelwyd â nhw ac a archwiliwyd gan grŵp ffocws rhieni STAND Gogledd Cymru CIC, a’r rheiny a archwiliwyd gan dîm Cydlynu Chwarae Hygyrch Cyngor Sir Ddinbych, daethom i’r casgliad nad oedd yr un man chwarae yn gwbl hygyrch a chynhwysol i blant, pobl ifanc neu oedolion ag anghenion ychwanegol ac anableddau. Er bod rhai mannau chwarae yn cynnig gwell darpariaeth nag eraill, nid oedd yr un o’r safleoedd a archwiliwyd yn darparu profiad cwbl hygyrch a chynhwysol i ymwelwyr y safle.
Mae STAND Gogledd Cymru wedi creu argymhellion i Gyngor Sir Ddinbych, cynghorau lleol, awdurdodau lleol, datblygiadau tai a Llywodraeth Cymru i helpu i wneud Mannau Chwarae yn fwy hygyrch, cynhwysol ac addas i bawb.
I gael y newyddion a’r wybodaeth ddiweddaraf ewch i wefan STAND.