Lead Organisation: STAND Gogledd Cymru CBC
Diben yr arolwg
Cynhaliwyd yr arolwg hwn gan STAND Gogledd Cymru CBC er mwyn deall yn well feddyliau, barn a phrofiadau teuluoedd ar draws Gogledd Cymru sy’n cefnogi plant, pobl ifanc ac oedolion ag anghenion ychwanegol ac anableddau, o ran mynediad i gyfleusterau toiledau cyhoeddus.
Sut y cynhaliwyd yr arolwg
Crëwyd yr arolwg ar SurveyMonkey a rhannwyd y ddolen hefo’r rhai ar restr bostio STAND Gogledd Cymru CBC. Roedd hyn yn cynnwys yr holl rieni, gofalwyr a gweithwyr proffesiynol, yn ogystal ag oedolion ag anghenion ychwanegol, y mae STAND Gogledd Cymru CIC yn eu cefnogi.
Yn ogystal, rhannwyd yr arolwg ar ein cyfryngau cymdeithasol lle gwnaethom annog pobl i gymryd rhan a rhannu o fewn eu cymunedau.
Cynrychiolaeth o fewn yr arolwg
Roedd yr arolwg yn fyw rhwng mis Mawrth a dechrau mis Awst 2024 a chawsom gyfanswm o 127 o ymatebion i’r arolwg hwn o bump o’r chwe sir yng Ngogledd Cymru.
Dylid nodi nad yw cynrychiolaeth o bob sir wedi’i dosbarthu’n gyfartal ymhlith ymatebwyr, gyda rhai siroedd yn ymgysylltu mwy nag eraill.
Casgliadau i’w cymryd o’r arolwg
Mae’r adroddiad hwn yn amlygu y gall presenoldeb cyfleusterau addas fod yn ffactor dyngedfennol i unigolion ag anableddau o ran eu gallu i fynd allan a chymryd rhan, lle gallai eraill eu diystyru neu eu cymryd yn ganiataol fel rhan arferol o fywyd. Mae sicrhau hygyrchedd mewn mannau cyhoeddus yn ymwneud nid yn unig â chydymffurfio â safonau, ond â galluogi cyfle cyfartal i bawb fwynhau rhyddid teithio a hamdden heb rwystrau ac atal arwahanrwydd cymdeithasol nid yn unig unigolion, ond teuluoedd cyfan.
Mae’n amlygu, er ei bod yn hysbys bod toiledau i’r anabl yn bresennol yn yr ardal, bod llawer ohonynt mewn cyflwr gwael, angen sylw, neu allan o wasanaeth. Yn syml, nid yw cael y cyfleusterau hyn yn gwarantu eu bod yn hygyrch, pwynt arwyddocaol a ddaeth i’r amlwg yn ein hymchwiliad. Mae’n dangos bod llawer o gyfleusterau newid yn addas ar gyfer babanod neu blant bach yn unig. Mae’n ymddangos bod camsyniad bod angen cyfleusterau newid ar gyfer babanod a phlant bach yn unig.
Mynegodd 94.5% o gyfranogwyr bryderon ynghylch y nifer annigonol o doiledau hygyrch.
Credwn yn gryf y dylai llywodraeth Cymru a chynghorau lleol flaenoriaethu mwy o arian ar gyfer amwynderau cyhoeddus, yn enwedig i wella hygyrchedd i’r rhai ag anghenion arbennig neu anableddau. Yn hytrach nag ystyried cau’r cyfleusterau hyn fel mesur i arbed costau, mae’n hanfodol cydnabod gwerth hirdymor a manteision cymdeithasol eu cynnal a’u gwella.