Fe hoffai Bwrdd Partneriaeth Plant Gogledd Cymru glywed gan unrhyw un sy’n ymwneud â chefnogi plant, pobl ifanc a theuluoedd sydd â chyflyrau niwroddatblygiadol am yr hyn sy’n gweithio’n dda a’r hyn y gellid ei wella. Mae cyflyrau niwroddatblygiadol yn cynnwys Awtistiaeth, ADHD, Dyslecsia, Dyspracsia, neu Tourette’s a thiciau.
Yn benodol, fe hoffem ddysgu pa gefnogaeth fyddai’n fwyaf defnyddiol cyn cael diagnosis, yn cynnwys cyn a thra eich bod ar restr aros am ddiagnosis. Rydym ni’n arbennig o awyddus i glywed barn plant, pobl ifanc a theuluoedd sydd â phrofiad bywyd, sydd eisoes wedi cael eu rhannu gyda chi, fel nad ydym yn gofyn iddynt ailadrodd eu straeon pan nad oes angen iddynt wneud hynny.
Pa straeon i’w cynnwys:
- Straeon o Ogledd Cymru.
- Straeon am blant a phobl ifanc 0 i 25 oed. Fe allai hyn gynnwys straeon gan blant a phobl ifanc eu hunain, gan yr oedolion yn eu bywydau neu gan oedolion am eu profiadau nhw pan oeddynt yn blant.
- Straeon am bethau a weithiodd yn dda, pethau aeth o’u lle ac unrhyw beth yn y canol.
Fe allant fod mewn unrhyw fformat, yn cynnwys straeon ysgrifenedig, astudiaethau achos, fideos neu adroddiadau ffurfiol. Cofiwch gael caniatâd cyn rhannu straeon pobl eraill.
Fe fyddwn ni’n defnyddio’r wybodaeth yma i helpu i lywio trafodaeth rhwng ystod o bartneriaid gofal cymdeithasol i blant, iechyd, addysg a’r heddlu ynglŷn â sut i gefnogi plant, pobl ifanc a theuluoedd yn well yng Ngogledd Cymru.
Sut mae cymryd rhan
E-bostiwch nwrich@denbighshire.gov.uk gydag:
- unrhyw wybodaeth yr hoffech ei gyflwyno erbyn dydd Gwener 1 Rhagfyr 2023 a/neu
- gadewch i ni wybod eich manylion cysylltu os hoffech chi fod yn rhan o drafodaethau yn y dyfodol am y testun yma.
Amdanom ni
Mae Bwrdd Partneriaeth Plant Gogledd Cymru yn is-grŵp o Fwrdd Partneriaeth Rhanbarthol Gogledd Cymru sydd yn edrych yn benodol ar faterion sydd yn effeithio ar blant, pobl ifanc, a theuluoedd. Mae ein blaenoriaethau’n cynnwys iechyd meddwl plant, plant anabl, pobl ifanc sy’n derbyn gofal gan eu hawdurdod lleol ac atal trais yn erbyn plant. Mae’r bwrdd yn cynnwys cynrychiolwyr o blith gofal cymdeithasol plant, iechyd, addysg a’r heddlu.