Mae’r Gronfa Integreiddio Rhanbarthol Iechyd a Gofal Cymdeithasol yn rhaglen 5 mlynedd gan Lywodraeth Cymru o Ebrill 2022 i Fawrth 2027 er mwyn helpu i integreiddio gwasanaethau iechyd a gofal.
Grwpiau â Blaenoriaeth
Y nod yw i ddatblygu modelau newydd o ofal i gefnogi grwpiau â blaenoriaeth. I gael rhagor o wybodaeth ynglŷn â’r hyn mae’r Bwrdd Partneriaeth Rhanbarthol yn ei wneud i wella gwasanaethau ar gyfer y grwpiau hyn dilynwch y dolenni isod.
- Pobl gydag anableddau dysgu
- Gofalwyr di-dâl
- Pobl sy’n byw gyda dementia
- Plant a phobl ifanc gydag anghenion cymhleth
- Pobl gydag anghenion emosiynol ac iechyd meddwl
Modelau gofal
Y modelau gofal sy’n cael eu datblygu yw:
Gofal wedi’i leoli yn y gymuned – atal a chydlynu cymunedol
Gwasanaethau cymunedol sy’n helpu i amddiffyn preswylwyr rhag problemau iechyd neu les tymor hirach, gan gynnwys grwpiau cyfeillio, canolbwynt cymunedol, cefnogaeth i ofalwyr a mynediad at wasanaethau lles.
Gofal wedi’i leoli yn y gymuned – gofal cymhleth yn nes at adref
Cymorth i wella adferiad yn dilyn cyfnod o afiechyd ac i fod yn fwy annibynnol yn yr hirdymor. Mae hyn yn cynnwys cymorth yn y cartref gan dimau arbenigol sy’n gweithio yn y gymuned ac adsefydlu cymunedol.
Hyrwyddo iechyd a lles emosiynol da:
Creu a gwella gwasanaethau ar gyfer oedolion a phobl ifanc sydd angen cefnogaeth o ran iechyd a lles emosiynol, er enghraifft gwasanaethau iCAN ar hyd a lled Gogledd Cymru a gweithgareddau cymunedol i helpu i wella lles meddyliol.
Cefnogi teuluoedd i aros gyda’i gilydd yn ddiogel, a chymorth therapiwtig i blant â phrofiad o ofal
Fe fydd partneriaid iechyd, gofal cymdeithasol ac addysg yn gweithio gyda theuluoedd i’w helpu i aros gyda’i gilydd yn ddiogel ac atal yr angen i blant ddod yn blant sy’n derbyn gofal gan yr awdurdod lleol. Mae hyn yn cynnwys prosiectau ymyrraeth gynnar; prosiectau i feithrin gwytnwch teuluoedd fel cynadleddau grwpiau teulu, LIFT (y Gwasanaeth Teuluoedd Integredig Lleol) a MST (Therapi Amlsystemig) a chefnogaeth breswyl ddwys, timau cefnogi a chymorth arbenigol i blant gydag anghenion cymhleth.
Adref o’r ysbyty
Fe fydd rhai pobl angen triniaeth mewn amgylchedd ysbyty bob amser, ac felly bydd hyn yn helpu pobl i gael eu rhyddhau o’r ysbyty a gwella adref yn ddiogel a chyflym. Mae hefyd yn sicrhau fod y rhai sydd angen gofal acíwt yn gallu cael mynediad i hynny yn hawdd.
Datrysiadau wedi eu lleoli mewn llety
Darparu amgylcheddau byw cynnes, diogel a chefnogol. Mae hyn yn cynnwys darparu cefnogaeth i blant ac oedolion gydag anableddau ac anghenion cymhleth a gwasanaeth dilyniant i gefnogi oedolion ifanc sydd ag anableddau corfforol a/neu dysgu i gynyddu eu hannibyniaeth yn eu cartrefi eu hunain.
Lawrlwythiadau
Ffrydiau ariannu blaenorol
Mae’r gronfa yn disodli’r Gronfa Trawsnewid a’r Gronfa Gofal Integredig. I gael rhagor o wybodaeth.
