Mae Hwb Gwyddorau Bywyd Cymru yn parhau i drawsnewid iechyd a gofal cymdeithasol drwy atebion arloesol sy’n mynd i’r afael â heriau na welwyd eu tebyg o’r blaen. Mae Adroddiad Blynyddol 2023-24 yn tynnu sylw at sut mae cydweithio strategol a chymorth wedi’i deilwra yn cyflymu arloesi sy’n achub bywydau, yn gwella ansawdd gofal, ac yn sbarduno twf economaidd ledled Cymru.
Dros y flwyddyn ddiwethaf, mae Hwb Gwyddorau Bywyd Cymru wedi chwarae rhan hollbwysig yn y gwaith o ddatblygu prosiectau arloesol sy’n ail-lunio gofal iechyd. Mae ystadegau newydd yn pwysleisio enw da cynyddol Cymru fel cyrchfan flaenllaw ar gyfer arloesi ym maes iechyd a gofal cymdeithasol, gan ddenu buddsoddiad sylweddol a sicrhau gwelliannau amlwg wrth ddarparu gofal.
Uchafbwyntiau Effaith 2023-24:
- 51,566 o gleifion wedi cael mynediad at ofal iechyd arloesol
- £25.4 miliwn o gynigion cyllido wedi’u cyflwyno
- 2,290 yn llai o ymweliadau clinigol
- 147 o asesiadau arloesi wedi’u cynnal
- 58 o swyddi wedi’u creu
- £5.5 miliwn o fuddsoddiad wedi’i sicrhau
- £1.7 miliwn o gyllid wedi’i sicrhau
- £3.1 miliwn o Werth Ychwanegol Gros (GVA) wedi’i ddarparu i’r economi
- £1.5 miliwn o werth wedi’i gynhyrchu ar gyfer y system iechyd a gofal
Mae’r Adroddiad Blynyddol yn tanlinellu sut mae Hwb Gwyddorau Bywyd Cymru yn gweithredu fel cysylltydd hanfodol ar draws meysydd iechyd, gofal cymdeithasol a diwydiant, gan sbarduno newid drwy sawl menter gyffrous sydd ar gael yn yr adroddiad.
Dywedodd Cari-Anne Quinn, Prif Swyddog Gweithredol Hwb Gwyddorau Bywyd Cymru, “Mae Adroddiad Blynyddol 2023-24 yn tynnu sylw at y cynnydd anhygoel sydd wedi cael ei wneud gan bartneriaid ym meysydd iechyd, gofal cymdeithasol a diwydiant. Gyda mwy na 50,000 o bobl yn elwa o arloesi ym maes iechyd, mae ein pwrpas yn gryfach ac yn fwy sylweddol nag erioed, ac mae balchder yn y partneriaethau rydym wedi’u meithrin i wneud Cymru’n arweinydd o ran arloesi ym maes iechyd a gofal.”
