Beth yw Mapio Effaith Ymledol?
Mae Mapio Effaith Ymledol yn ddull gwerthuso sy’n helpu i edrych ar y ffyrdd rydym yn gweithio, canlyniadau ein gwaith, a’r straeon a adroddwn. Mae’n ffordd o ddychmygu’r siwrnai a’r camau a gymerwn i gyflawni’r nodau a osodwn, yn ogystal â’r holl wersi a ddysgwyd, ac unrhyw fylchau ar hyd y ffordd.
Pam Mapio Effaith Ymledol?
Mae pobl yn unigryw, sy’n golygu bod rhaid i’r gwasanaethau iechyd a gofal cymdeithasol sy’n eu cefnogi allu addasu a chanolbwyntio ar yr unigolyn. Efallai na fydd yr hyn sy’n gweithio i un unigolyn yn gweithio i rywun arall. Mae gwasanaethau iechyd a gofal cymdeithasol yn aml yn gweithio mewn ffordd sy’n canolbwyntio ar yr unigolyn, sy’n golygu bod y gefnogaeth a roddant yn aml yn gallu bod yn bwrpasol. Gall fod yn anodd nodi beth mae gwasanaethau iechyd a gofal cymdeithasol yn ei wneud ar daenlen neu gyda rhifau’n unig. Felly, rydym yn edrych ar ffyrdd newydd o werthuso gwasanaethau a chofnodi’r gwaith anhygoel a wnânt i’r bobl a gefnogant. Rydym yn credu fod Mapio Effaith Ymledol yn ddull gwerthuso effeithiol ac yn nodi’r siwrnai gyfan.
Sut rydym wedi bod yn defnyddio Mapio Effaith Ymledol?
Rydym wedi bod yn defnyddio Mapio Effaith Ymledol i gefnogi gwasanaethau a ariennir gan y Gronfa Integreiddio Rhanbarthol i werthuso’r gwaith a wnânt ar gyfer eu hadroddiadau i Lywodraeth Cymru.
Fy mhrofiad gyda Mapio Effaith Ymledol.
Mae defnyddio Mapio Effaith Ymledol fel dull gwerthuso wedi rhoi cyfle i mi fynd at wasanaethau a chwrdd â thimau ledled Gogledd Cymru. Mae’n werthfawr iawn rhoi wynebau i enwau a chreu cysylltiadau cryfach gyda phobl rwyf wedi bod yn gweithio gyda nhw ar lein-yn unig.
Bu’n bleser helpu i hwyluso’i gweithdai Mapio Effaith Ymledol a gweld y timau yn datblygu dealltwriaeth, eglurder a gwerthfawrogiad o’r gwaith a wnânt a gweld yr holl rannau manwl o’u gwasanaeth. Rwyf wedi mwynhau gweld pobl yn gwerthfawrogi rhai o’r camau llai a gymerant i gyflawni canlyniad neu nod. Yn aml y camau llai hynny (megis eistedd gyda rhywun a gwneud paned o de) sydd wedi arwain at gysylltiadau cryfach a gwell cyfathrebu.
I mi’n bersonol rwyf wedi cael gwell dealltwriaeth o’r gwasanaethau rwy’n eu cefnogi. Rwy’n gweld y natur ddynol, y calonnau a’r angerdd y tu ôl i’r rhifau, adroddiadau ysgrifenedig a’r astudiaethau achos rwy’n eu cael. Rwy’n gwybod bod y broses wedi fy ngwneud yn well swyddog gwerthuso ac yn fwy medrus i ysgrifennu adroddiadau sy’n rhoi gwell darlun o’r gwasanaethau a’r gwaith a wnânt.
A allaf ddefnyddio Mapio Effaith Ymledol?
Wrth gwrs! Os hoffech fwy o wybodaeth am Fapio Effaith Ymledol, cysylltwch â ni ar: NWRICH@denbighshire.gov.uk
