Ar 5 Mawrth 2025 daethom â darparwyr technoleg ddigidol ynghyd â phobl sy’n cynllunio, defnyddio a darparu gofal cymdeithasol ar gyfer Arddangosfa Gofal Cymdeithasol Digidol cyntaf Gogledd Cymru. Ariannwyd y digwyddiad gan nawdd gan gwmnïau technoleg fel Synanetics. Roedd yn llwyddiant mawr gyda gofodau i gysylltu a myfyrio ynghylch sut rydym yn defnyddio technoleg ddigidol ac yn rhoi cynnig ar bethau drosom ein hunain.
Roedd y gweithdai’n cynnwys:
- Syniadau ar gyfer defnyddio technolegau bob dydd i’ch helpu i fyw’r ffordd o’ch dewis.
- Sut i gyd-ddylunio datrysiad gofal pwrpasol gan ddefnyddio technolegau smart bob dydd.
- Apiau ffôn symudol y gallwch eu defnyddio i helpu i wella’ch iechyd a’ch lles.
- Sut i helpu’ch sefydliad a’ch staff i baratoi ar gyfer dyfodol digidol.
- Cyfle i weld a rhoi cynnig ar declynnau rheoli meddyginiaeth i gefnogi pobl i gymryd eu meddyginiaeth ar amser.
Roedd tua 190 o bobl yn bresennol ar y diwrnod, yn ogystal â siaradwyr, arddangoswyr a threfnwyr. Dywedodd pobl wrthym mai eu prif uchafbwyntiau oedd rhwydweithio, clywed gan bobl ag anableddau dysgu am eu profiadau, arddangosiadau a straeon profiad defnyddwyr, cyflwyniad CLlLC, gweithdai ac arddangosfeydd. Rydym hefyd wedi dechrau mapio effeithiau crychdonni’r digwyddiad, sy’n cynnwys gwell perthnasoedd rhwng partneriaid ar gyfer hwyluso arloesedd digidol a chymorth i ddatblygu syniadau arloesol.
