Sefydlwyd y Bwrdd Partneriaeth Rhanbarthol Plant ym mis Mawrth 2022 i edrych yn benodol ar faterion sy’n effeithio ar blant, pobl ifanc a theuluoedd yng Ngogledd Cymru
Rydym yn gyfrifol am amrywiaeth eang o faterion sy’n wynebu gwahanol grwpiau oedran, o fabanod i oedolion ifanc. Mae ein blaenoriaethau’n cynnwys iechyd meddwl plant, plant anabl, pobl ifanc sy’n derbyn gofal gan eu hawdurdod lleol ac atal trais yn erbyn plant. I fynd i’r afael â’r rhain gallwn dynnu ar amrywiaeth o brofiadau gan fod ein grŵp yn cynnwys cynrychiolwyr o ofal cymdeithasol plant, iechyd, addysg a’r heddlu.
Datganiad Cenhadaeth
Bwrdd Partneriaeth Rhanbarthol Plant Gogledd Cymru
- gwneud yr hyn sy’n bwysig i blant a’u teuluoedd
- cydweithredu a gweithio gyda’n gilydd
- dangos arweinyddiaeth.
- galluogi newid mewn sefydliadau
Gwerthoedd ac egwyddorion arweiniol
Mae’n bwysig i’r grŵp fod y Bwrdd Partneriaeth Plant Rhanbarthol yn:
- gwneud penderfyniadau sy’n seiliedig ar dystiolaeth.
- yn cydweithio gan feithrin diwylliant cydweithredol
- yn gynhwysol, gan ddod â phawb sy’n gweithio i gefnogi pobl ifanc at ei gilydd.
- yn cyfathrebu’n glir ac yn agored.
- yn sicrhau mai budd y plentyn sydd wrth wraidd yr hyn y mae’n ei wneud bob amser
Mae ein holl waith yn seiliedig ar hawliau plant fel y’u pennir yng Nghonfensiwn y Cenhedloedd Unedig ar Hawliau’r Plentyn. Mae’r hawliau hyn yn cynnwys yr hawl i addysg, iechyd, cyfleoedd chwarae a hamdden, cymryd rhan mewn penderfyniadau amdanyn nhw eu hunain a bod yn ddiogel.
Rydym yn defnyddio egwyddorion arweiniol fframwaith NYTH ar gyfer gwella iechyd meddwl a lles. Mae hyn yn cynnwys sicrhau bod oedolion y mae’r plentyn yn ymddiried ynddynt, y rhai hynny sydd agosaf at y plentyn, yn cael mynediad rhwydd at yr arbenigedd a fydd yn eu cefnogi nhw i ‘ddal gafael’ ar blant lle bynnag bosib yn lle ‘atgyfeirio ymlaen’. A lle bo angen cefnogaeth fwy arbenigol, rydym eisiau sicrhau nad oes unrhyw ‘ddrws anghywir’. Bydd plant, pobl ifanc a’u teuluoedd yn cael eu cynnwys yn ein ffyrdd newydd o weithio a fydd yn seiliedig ar yr hyn sy’n bwysig iddyn nhw, gyda’u lles yn cael ei gefnogi ar draws addysg a thrwy gymunedau diogel a chefnogol.
Y Drws Cywir
Y Drws Cywir yw ein cynllun ar gyfer gwireddu’r egwyddor o ‘ddim drws anghywir’ i blant, pobl ifanc a theuluoedd yng Ngogledd Cymru. Lle bynnag yr ewch i chwilio am gefnogaeth – yr ysgol, gwasanaeth cymunedol, gwasanaeth cymdeithasol neu wasanaeth iechyd, byddwch yn cael cymorth.