Diolch yn fawr iawn i bawb sydd wedi cyfrannu at y Strategaeth Anabledd Dysgu. Roedd dros 300 o bobl wedi helpu i ysgrifennu’r strategaeth ac roedd gwybodaeth amdani wedi cyrraedd llawer mwy. Mae’r strategaeth nawr yn barod ac yn gwneud ei ffordd drwy’r prosesau cymeradwyo ffurfiol. Mae adroddiadau ymgynghori ar y strategaeth nawr ar ein gwefan a byddwn yn cyhoeddi’r strategaeth yma gynted ag y caiff ei chadarnhau.
Beth Nesaf?
Er mwyn helpu i roi’r strategaeth ar waith rydym wedi gwneud cais llwyddiannus am £1.7 miliwn o gronfa trawsnewid Llywodraeth Cymru. Bydd y prosiect yn rhedeg tan 2020 ac ymgymerir â’r pump pecyn gwaith yn y strategaeth.
- Strwythurau integredig: Sicrhau bod gwasanaethau iechyd a chymdeithasol yn gweithio gyda’i gilydd yn well i gefnogi pobl ag anableddau dysgu.
- Datblygu’r gweithlu: Sicrhau fod staff yn gwybod sut i gyfathrebu’n well â phobl ag anableddau dysgu a newid gwasanaethau fel eu bod yn haws i’w defnyddio. Bydd hyn yn helpu pobl i gael y gofal iechyd sydd ei angen arnynt. Sicrhau fod pobl sydd eisiau cefnogaeth yn Gymraeg yn gallu ei chael heb orfod gofyn.
- Comisiynu a chaffael: Gweithio gyda sefydliadau eraill i wneud yn siŵr bod gennym y mathau o dai a’r gefnogaeth y mae pobl eu hangen.
- Newid cymunedol a diwylliant: Gweithio gyda’r gymuned leol i sicrhau bod pobl ag anableddau dysgu yn cael mynediad at lawer o wahanol weithgareddau a chwrdd â phobl newydd os ydynt am wneud hynny. Helpu mwy o bobl ag anableddau dysgu i gael swyddi cyflogedig.
- Technoleg gynorthwyol: Dod o hyd i ffyrdd o ddefnyddio technoleg fel larymau a ffonau symudol i gynorthwyo pobl i fod yn fwy annibynnol.
Cymryd Rhan
- Mae swyddi’r tîm prosiect yn cael eu hysbysebu ar wefan Sir y Fflint
- Cyfleoedd i sefydliad neu gonsortiwm o sefydliadau i werthuso a darparu rôl ‘cyfaill beirniadol’ i gefnogi a herio’r prosiect yn cael eu hysbysebu ar wefan Gwerthwch i Gymru
- Cyfleoedd i ddarparwyr gyfrannu at y fforwm darparwyr yn cael ei hysbysebu ar ein gwefan.
Llongyfarchiadau i’r Grŵp Cyfranogiad Anableddau Dysgu sydd wedi ennill gwobr!
Cyflwynwyd y wobr i’r grŵp yng Ngwobrau Pobl Yn Gyntaf Cymru 2018 i gydnabod eu cyfraniad eithriadol i fyfyrdod a dysgu. Maent wedi gwneud gwaith gwych yn helpu i ddatblygu’r Strategaeth Anabledd Dysgu a llunio’r strategaeth mewn Cymraeg a Saesneg Hawdd Ei Ddeall. Llongyfarchiadau!
I gael rhagor o wybodaeth
Mae’r wybodaeth ddiweddaraf am y strategaeth a beth sy’n digwydd nesaf ar gael ar ein gwefan.
Bydd unrhyw ddiweddariadau’n cael eu rhannu gyda’r sawl ar ein rhestr bostio Strategaeth Anabledd Dysgu. Os hoffech gael eich ychwanegu at y rhestr bostio hon, cysylltwch â sarah.bartlett@denbighshire.gov.uk
