Lead Organisation:
Nod yr ymgynghoriad hwn oedd darganfod sut mae Pandemig y Covid wedi effeithio ar bobl ifanc 11 i 24 oed dros y flwyddyn ddiwethaf a pha gefnogaeth sydd ei hangen. Cafwyd oddeutu 290 ymateb, gyda’r mwyafrif o gyfranwyr o Wrecsam ac oddeutu 50 ymateb gan blant a phobl ifanc Sir y Fflint. Roedd y mwyafrif o’r cyfranwyr o fewn oedran ysgol, gydag oddeutu 8% rhwng 19 a 24 oed.
Darganfyddiadau’r arolwg
Roedd y mwyafrif o bobl ifanc, oddeutu 70%, yn gwybod sut i ganfod gwybodaeth ddibynadwy am y coronafeirws. Roeddent yn tueddu i ofyn am gefnogaeth gan deulu a/neu ffrindiau, gan athrawon/yn yr ysgol, ar y we a gan y Gwasanaeth Iechyd Meddwl Plant a Glasoed (CAMHS).
Addysg oedd prif bryder pobl ifanc o ran effaith y coronafeirws ar eu dyfodol. Roedd y cyfranogwyr yn dweud eu bod nhw’n poeni am eu graddau, y gwaith a gollwyd, y blynyddoedd ysgol a gollwyd, eu hopsiynau, dysgu o adref, dyled prifysgol heb gael yr un profiad dysgu, dal i fyny â’r gwaith, diffyg trefn a ddim yn cael eu dysgu o gwbl am yr holl gynnwys sydd ei angen.
Plîs, Plîs, Plîs, dwi’n erfyn arnoch chi i gynnig rhywfaint o gymorth gydag ein TGAU, oherwydd mae’n hollol annheg ein bod ni wedi colli dros flwyddyn o weld ein ffrindiau a’n teuluoedd ac mae wedi cael effaith ar ein hiechyd meddwl.
Yr hyn yr oedd pobl ifanc yn gweld ei eisiau fwyaf oedd teulu a ffrindiau, cymdeithasu a mynd allan. Dywedodd rhai hefyd bod eu perthnasau ag eraill wedi gwella, megis teimlo’n agosach at deulu a’i gweld yn haws siarad â ffrindiau mewn gwahanol ysgolion.
Mynegodd oddeutu 60% o’r cyfranogwyr bod eu hiechyd meddwl wedi newid mewn modd negyddol a dywedodd 30% eu bod wedi gorfod cael cefnogaeth gyda’u hiechyd meddwl a’u lles dros y flwyddyn ddiwethaf. Nifer fach (30%) o gyfranogwyr oedd o’r farn bod eu hiechyd meddwl wedi gwella.
Ro’n i’n ei gweld hi’n anoddach delio â straen, yn enwedig pan es i’n ôl i’r ysgol.
Mae wedi gwella gan nad oes gennyf gymaint o bethau i boeni amdanynt o ran yr ysgol ac athrawon. Dwi hefyd wedi dod yn fwy hyderus.
Prif bryder 17% o’r atebwyr oed dal neu ledaenu Covid-19 a’r risgiau i’w teuluoedd a’u ffrindiau.
Yr hyn sy’n fy mhryderu fwyaf ar y funud yw fy mod i, aelodau o fy nheulu neu fy ffrindiau yn dal y feirws a chael yn wael iawn a gorfod mynd i’r ysbyty neu hyd yn oed y posibilrwydd o farw.
Ges i’r Covid tra’r oeddwn yn byw gyda fy nhaid. Mae’n debygol iawn ei fod wedi ei ddal gennyf i a bu farw. Nawr, bydd rhaid i mi fyw gyda’r euogrwydd am byth.
Dywedodd nifer fach o gyfranogwyr, oddeutu 3%, fod y pandemig wedi cael effaith ar eu hiechyd corfforol, gan gynnwys arferion bwyta a chysgu, colli apwyntiadau iechyd a ffitrwydd. Dywedodd oddeutu 12% o’r cyfranogwyr eu bod nhw neu’r teulu wedi gorfod cael cymorth ariannol dros y flwyddyn ddiwethaf, gan gynnwys cymorth budd-daliadau. Dywedodd llai na 5 o bobl ifanc eu bod nhw angen cyngor a chefnogaeth ynghylch gamblo.