Lead Organisation: Cyngor Gwynedd
Fel rhan o’r Asesiad o Anghenion y Boblogaeth fe drafododd grŵp o 14 o bobl gydag anableddau dysgu sy’n byw yng Ngwynedd eu profiadau o’r gwasanaethau a’r gefnogaeth maent ei hangen i fyw eu bywydau fel y maent yn ei ddymuno.
Dywedodd y grŵp eu bod yn gallu cymryd rhan mewn pob math o weithgareddau cymunedol gan gynnwys cerdded, nofio a gweld ffrindiau. Ond mae yna rai rhwystrau. Er enghraifft, ni chynhaliwyd rhai gweithgareddau o ganlyniad i Covid ac mae rhai darparwyr yn cyfyngu pa mor bell y gallant deithio ac felly dim ond gweithgareddau lleol y gallant eu mynychu.
Mae’r cymorth sydd ar gael yn cynnwys y teulu, gweithwyr cymorth, eiriolwyr, nyrsys cymunedol, gweithwyr cymdeithasol a chydweithwyr yn y gwaith. Dywedodd rhai unigolion y gallant wneud pethau eu hunain heb gymorth.
Pethau sy’n gweithio’n dda yw cael cymorth pan fo angen, yn arbennig i fynd o’r tŷ a chael eu clywed. Dywedodd pobl fod cymorth wedi eu helpu i wneud yr hyn maent yn ei ddymuno ac i roi cynnig ar bethau newydd.
Mae staff yn gweithio gyda mi, i wneud y tasgau na fedra i eu gwneud, rydym yn gweithio fel tîm.
Ymhlith y pethau nad ydynt yn gweithio cystal roedd problemau cyfathrebu, er enghraifft staff yn newid shifftiau gwaith heb ddweud wrthynt neu staff ddim yn dod i nôl rhywun ar gyfer apwyntiad ysbyty pan fo hynny wedi’i drefnu. Dywedodd rhai pobl nad oeddent yn teimlo y gallent siarad am rywbeth personol neu fod unrhyw un yn gwrando ar eu teimladau. Roedd bron i hanner y grŵp wedi profi staff cymorth yn chwarae gyda’u ffonau tra roeddent yn cael cymorth. Hefyd dywedodd aelodau o’r grŵp nad oeddent yn gallu rhoi cynnig ar wahanol weithgareddau.
Mae’n teimlo weithiau mai mond pethau o restr osod o weithgareddau sydd yna i neud.
Os yw’r staff ar eu ffonau symudol y teimlad yw ei bod yn iawn i yrru neges sydyn, ond i beidio chwarae gemau ar y ffôn. Mae angen bod yn rhesymol pan yn defnyddio eu ffonau symudol.
Fe allai cymorth fod yn well pe gallai pobl roi cynnig ar bethau newydd a phe baent yn cael cymorth i gael y swyddi maent yn eu dymuno.
Hoffwn wneud pethau sydd ddim ar gyfer pobl gydag anabledd dysgu yn unig.
Pethau eraill a fyddai’n helpu yw cymorth cyson a hyblyg gyda chyfathrebu clir. Hefyd roedd llawer o bryderon yn ymwneud â’r pandemig, pryderon y bydd Covid yn dod yn ôl, colli gweithgareddau a phryderon nad yw pethau yn mynd yn ôl i normal. Hefyd mae yna angen am fwy o staff a mwy o leoedd i bobl ag anableddau dysgu fyw ynddynt.