Canfyddiadau arolwg staff iechyd a gofal cymdeithasol ynghylch ymchwil, arloesi a gwelliant yng Ngogledd Cymru.
Cynhaliodd Hwb Cydlynu Ymchwil, Arloesi a Gwelliant Gogledd Cymru arolwg rhwng mis Ebrill a mis Mehefin 2021 i ddarganfod beth oedd staff yn credu sydd angen newid er mwyn cefnogi ymchwil ac arloesi a gwella gwasanaethau iechyd a gofal cymdeithasol. Roedd y gwaith hwn yn rhan o brosiect parhaus sydd hefyd yn defnyddio cyfweliadau a gweithdai i ddatblygu’r syniadau hyn ymhellach.
Ymatebodd 20 o bobl i’r arolwg o amrywiaeth o sefydliadau gan gynnwys y GIG, cynghorau lleol, prifysgolion a’r trydydd sector. Roedd y nifer hwn yn isel o’i gymharu ag arolygon eraill yr ydym yn eu cyhoeddi yn yr un modd. Gall hyn fod oherwydd bod staff yn brysur iawn ar hyn o bryd, ond fe allai hefyd awgrymu nad oedd pobl yn credu ei fod yn berthnasol iddyn nhw, neu efallai nad oedd ganddynt lawer i’w ddweud am y pwnc. Diolch yn fawr iawn i bawb a gymerodd ran.
Ynglŷn â’r cyfranogwyr
Dywedodd pob un o’r cyfranogwyr eu bod yn cymryd rhan mewn gwaith ymchwil, arloesi neu welliant fel rhan o’u rôl. Roedd hyn yn cynnwys:
- Ymgymryd â gwaith ymchwil gan gynnwys ymchwilio i ganser neu ymchwilio i ddulliau gwasanaeth newydd.
- Cefnogi datblygiad gwaith ymchwil gan gynnwys addysgu, dygyfor gwybodaeth, hyrwyddo gwaith ar y cyd ac arferion yn seiliedig ar dystiolaeth.
- Dadansoddi data a gwybodaeth fusnes i gefnogi gwelliant gwasanaeth.
- Ymgysylltu ac ymgynghori ar newid a datblygiad gwasanaethau.
- Gwerthuso gwasanaethau ac adolygiadau gwasanaeth.
- Treialu technolegau arloesol.
- Archwiliadau a phrosiectau gwella ansawdd.
Beth sy’n gweithio’n dda ar hyn o bryd
Rhannodd nifer o gyfranogwyr enghreifftiau o beth sy’n gweithio’n dda ar hyn o bryd. Roedd hyn yn cynnwys:
- Cefnogaeth ar gyfer ymchwil, arloesi a gwelliant
- Cyfranogiad a chyfathrebu
- Amser dynodedig i wneud gwaith ymchwil a gwerthusiadau gyda chefnogaeth gan yr uwch dîm rheoli.
- Cyllid i roi prosiectau newydd ar waith a darparu cyfleoedd hyfforddiant a datblygu i staff a myfyrwyr.
- Strwythurau diwylliannol a threfniadol sy’n helpu i sicrhau gwelliant
- Ymgysylltu a chydgynhyrchu
Beth sy’n gweithio’n dda?
Adran ymchwil drefnus yn y bwrdd iechyd: trefniadau sefydliadol, nyrsys ymchwil, partneriaid.
Creu’r Hwb Cydlynu Ymchwil, Arloesi a Gwelliant – dyma ble rwy’n mynd i gael cyngor, cyfarwyddyd a chymorth.
Mae defnyddio technoleg ddigidol wedi gwella cyfleoedd cyfathrebu a’r potensial i weithio ar y cyd.
Beth y gellir ei wella?
Roedd digon o le i wella yn y meysydd hyn hefyd. Soniodd cyfranogwyr am y canlynol:
- Cefnogaeth ar gyfer ymchwil, arloesi a gwelliant gan gynnwys arbenigedd mewn helpu i ysgrifennu ceisiadau grant a chodi ymwybyddiaeth am y gefnogaeth sydd ar gael, megis cynllun Cymuned yr Ysgolorion.
- Cydweithio a chyfathrebu gan gynnwys cyfeiriad cyffredinol cliriach; cefnogi pobl i gyfarfod a rhwydweithio; gwerthfawrogi, cyhoeddi a rhannu enghreifftiau o ymchwil, arloesi a gwelliant; helpu pobl i ddod o hyd i ddiddordebau a rannir a dysgu gan ei gilydd.
- Yr angen am ragor o gyllid
- Diwylliant ac arweinyddiaeth. Rôl ymchwil ac arloesi fel offer i gefnogi canlyniadau gwell i ddinasyddion a’r angen am arweinyddiaeth da i werthfawrogi ymchwil, arloesi a gwelliant a rhoi cyfleoedd a chefnogaeth i staff arbrofi.
- Ymgysylltu a chyd-gynhyrchu: rhagor o bwyslais ar gyd-gynhyrchu, yn arbennig o ran arloesi a pholisïau, peidio â gwneud addewidion gwag, a sicrhau bod gofalwyr a’r bobl sy’n defnyddio gwasanaethau’n derbyn gwybodaeth.
- Blaenoriaethau ymchwil ac arloesi mewn gwaith i’r dyfodol.
Beth y gellir ei wella?
Rhagor o gefnogaeth, cyngor, gweithgorau a hyfforddiant ar gyfer prosiectau bychain i alluogi pobl i ymgyfarwyddo ag ymchwil a magu’r hyder a’r sgiliau i datblygu hyn.
Sut gall yr hwb eich cefnogi chi?
Dywedodd cyfranogwyr y gallai Hwb Cydlynu Ymchwil, Arloesi a Gwelliant Gogledd Cymru helpu â’r canlynol.
- Cysylltu pobl.
- Rhannu gwybodaeth, gan gynnwys gwybodaeth am lwyddiannau a methiannau, cyllid grant a chefnogaeth sydd ar gael, yn arbennig rhwng arbenigaethau gwahanol. Roedd awgrymiadau’n cynnwys diweddariadau misol/chwarterol, sesiynau hyfforddiant, gweithgorau a gweminarau.
- Darparu swyddogaeth gwella ar gyfer y Bwrdd Partneriaeth Rhanbarthol.
- Darparu cymorth gyda cheisiadau grant.
- Arwain newid diwylliannol mewn perthynas â defnyddio ymchwil ac arloesi i wella gwasanaethau, gan gynnwys canolbwyntio ar welliant a sut gallai ymchwil ac arloesi gefnogi hynny.
- Helpu i egluro’r gwahaniaeth mewn ystyron a roir i ymchwil ac arloesi yn y maes iechyd a gofal cymdeithasol a datblygu blaenoriaethau cyffredin.
- Darparu llwyfan i gynnal prosiectau ymchwil presennol a rhannu adroddiadau.
- Darparu neu gomisiynu ymchwil annibynnol i bynciau arbennig.
- Parhau i fod ar gael yn yr hirdymor.
- Deall rhwystrau i wella systemau a ffyrdd i ddatblygu gwasanaethau sy’n bodloni anghenion pobl yng Ngogledd Cymru.
- Darparu dull ar gyfer bwydo gwybodaeth allweddol ynghylch heriau a datrysiadau’r rheng flaen i’r Bwrdd Partneriaeth Rhanbarthol.
Y Camau Nesaf
Y camau nesaf ar gyfer y gwaith hwn yw casglu canfyddiadau’r arolwg a chanfyddiadau’r cyfweliadau a’r gweithdai ynghyd i ddatblygu datganiad o weledigaeth a siarter ar gyfer ymchwil, arloesi a gwelliant ar draws Gogledd Cymru. Bydd hyn hefyd yn helpu i lywio cynlluniau ar gyfer dyfodol yr Hwb Cydlynu Ymchwil, Arloesi a Gwelliant.