Mae’r gwaith mae’r Bwrdd Partneriaeth Rhanbarthol yn ei wneud i wella gwasanaethau ar gyfer gofalwyr wedi dechrau cyflymu. Yn ystod yr wythnosau diwethaf, mae Hawis Jones sy’n arwain ar ran y partneriaid ar ddatblygu, rheoli a chydlynu’r rhaglen waith wedi bod yn treulio amser yn dod i nabod pobl sy’n gweithio yn y maes e.e. darparwyr gwasanaethau cefnogol, swyddogion arweiniol yn y cynghorau a Bwrdd Iechyd Prifysgol Betsi Cadwaladr, yn ogystal â chynrychiolwyr o fudiadau cenedlaethol e.e. Carers Trust a Carers Wales. Yn ystod y cyfnod yma hefyd, mae’r Grŵp Arweinyddiaeth Rhanbarthol wedi cytuno ar y cyfeiriad i’r gwaith: rydym eisiau edrych ar wasanaethau i ofalwyr yng Ngogledd Cymru drwy lygaid gofalwyr er mwyn deall beth sy’n bwysig iddyn nhw. Rydym eisiau dangos ein bod yn cydnabod ac yn gwir gwerthfawrogi beth maent yn ei wneud wrth ofalu ac eisiau gwrando arnynt er mwyn gwella gwasanaethau a deall beth fydd yn eu helpu i barhau gyda’u cyfrifoldebau gofalu ac i’w cynorthwyo i fyw eu bywydau fel y maent ei eisiau.
Am y cyfnod nesaf, bydd y partneriaid yn canolbwyntio ar wneud dau ddarn o waith, sef:
1) Casglu straeon a phrofiadau gofalwyr. Byddwn yn galluogi gofalwyr i rannu mewn tair ffordd wahanol, sef yn ysgrifenedig, drwy eu recordio neu drwy gyfweliadau. Bydd hyn hefyd yn ychwanegu at y gwaith Asesiad Anghenion Poblogaeth sydd eisoes wedi ei wneud gan y Bartneriaeth.
2) Byddwn yn mapio y buddsoddiad a’r gwasanaethau sydd ar gael ar hyn o bryd i ofalwyr. Bydd y gwaith yma yn ein helpu i weld a yw ein gwasanaethau yn cyd-fynd gyda’r hyn mae gofalwyr yn ei ddweud sydd yn bwysig iddynt, ac yn gwneud yn siwr ein bod yn cael y budd mwyaf o’r adnoddau sydd gennym.
Os oes gan unrhywun syniadau eraill a fyddai’n ddefnyddiol gyda’r gwaith yma, yna cofiwch eich bod yn cysylltu gyda ni.
Gadael sylw